Shpallet rezultati zyrtar për zgjedhjet në Kosovë, Vjosa Osmani kandidatja më e votuar

Komisioni Qendror i Zgjedhjeve publikoi sot rezultatet e kandidatëve për deputetë nga zgjedhjet e 14 shkurtit, ku partia Lëvizja Vetëvendosje do të ketë 58 deputetë në Kuvendin e Kosovës.

Presidentja në detyrë, Vjosa Osmani në këto zgjedhje është kandidatja më e votuar në listën e LVV-së me 300 788 vota të marra, kurse i dyti në listën e kandidatëve më të votuar renditet Glauk Konjufca me mbi 200 mijë vota.

Nga lisa “Guxo” e Osmanit në zgjedhjet e 14 shkurtit, 5 deputetët fitues që do të ulen në Kuvendin e Kosovës janë: Donika Gërvalla, Faton Peci , Haxhi Avdyli, Jeta Statovci dhe Daorsa Kica.

Ndërkohë Partia Demokratike e Kosovës, ka arritur të grumbullojë mbi 148 mijë vota, duke pasur kështu 19 deputetë në Parlamentin e ri.

Kryeministri në detyrë, Avdullah Hoti është kandidati më i votuar i “Lidhjes Demokratike të Kosovës” në zgjedhjet e 14 shkurtit me 69.640 vota. LDK-ja do të ketë 15 deputetë së bashku me Behgjet Pacollin e AKR-së, i cili ka garuar në një listë në zgjedhjet e përgjithshme.

Në këto zgjedhje Aleanca për Ardhmërinë e Kosovës ka marrë 62.111 vota, ku në Kuvendin e Kosovës kanë siguruar vetëm 8 deputetë. Më të votuarit janë vëllezërit Haradinaj, ish-kryeministri Ramush Haradinaj ka marrë mbi 41 mijë vota, ndërsa Daut Haradinaj mbi 13 mijë vota.

Lexoni gjithashtu:

Rezultati i zgjedhjeve në Kosovë, Elezi sqaron procedurën për partitë që mund të bëjnë ankesa

Mbyllet numërimi i votave në Kosovë, LVV merr 58 mandate