Ambasadorja Yuri Kim thotë se për listat e kandidatëve do t’u kërkohet llogari udhëheqësve të partive

Ambasadorja e Shteteve të Bashkuara në Tiranë, Yuri Kim ngarkoi të dielën me përgjegjësi direkte udhëheqësit e partive politike për listat e kandidatëve që do të paraqesin ditën e hënë në Komisionin Qendror të Zgjedhjeve.

Përmes një mesazhi të postuar në Twitter, ambasadorja Kim sqaroi se SHBA-të kanë kërkuar hapur që partitë të jenë të kujdesshme në kandidimin e deputetëve, që ata të jenë njerëz “të pastër” me integritet dhe të denjë për përfaqësimin e qytetarëve. Ajo tha se nesër do të shihet nëse “mesazhi i SHBA-së është kuptuar apo jo”.

“Listat e depozituara nga partitë do na tregojnë nëse udhëheqësit shqiptarë e kanë kuptuar mesazhin nga SHBA-të, nëse janë të përkushtuar për t’u integruar në BE dhe nëse janë të gatshëm të marrin përsipër vendimet e nevojshme për një të ardhme më të begatë e më demokratike për Shqipërinë. Presim nga udhëheqësit e partive të tregojnë lidership të vërtetë,” – shton Kim.

Ambasadorja amerikane shtoi qartësisht se kryetarët e partive do të jenë përgjegjës dhe se për këtë “do t’u kërkohet llogari”. Ndër të tjera ajo nënvizoi se SHBA-të do të mbështesin Komisionin Qendror të Zgjedhjeve gjatë procesit të shqyrtimit dhe miratimit të listave.

…të vërtetë. Ne do t’u kërkojmë llogari udhëheqësve të partive. Po ashtu, do të mbështesim fort KQZ teksa shqyrton dorëzimin e listave të kandidatëve, çka është një detyrë që duhet marrë në radhë të parë në emër të votuesve shqiptarë.” @USAmbAlbania Yuri Kim https://t.co/zUMDpH0XHj

— USEmbassyTirana (@USEmbassyTirana) March 7, 2021

Lexoni gjithashtu:

”Sa më pak biznesmenë në kuvendin e ardhshëm”, Meta kërkon që të gjendet edhe mënyra për votimin e të infektuarve