Kryeministri Rama takohet me Mbretin Felipe VI në Spanjë

Kryeministri Edi Rama ndodhet këtë të mërkurë në një vizitë në Spanjë ku ka marrë pjesë në panairin global të turizmit “FITUR Madrid”.

Në rrjetin social facebook, shefi i qeverisë ka publikuar dhe një foto nga takimi që ai ka patur me Mbretin e Spanjës Felipe VI

“Madrid, Spanjë – Me Mbretin Felipe VI dhe më pas me investitorë e operatorë turistikë, në panairin global të turizmit “FITUR Madrid”, ku Shqipëria gëzon një vëmendje të veçantë si supriza befasuese e sezonit të kaluar”, shkruan Rama në facebook.

Kryeministri Edi Rama ka dhënë një intervistë pas çeljes së këtij panairi ku tha se tashmë Shqipëria është në një tjetër nivel dhe se duhet të prezantohet duke bërë më të mirën.

“Sigurisht që tanimë Shqipëria është në një nivel tjetër dhe na takon që në këtë nivel të prezantohemi me shije, të prezantohemi duke bërë më të mirën brenda hapësirës që na lejojnë mundësitë tonë, sepse nuk jemi as Italia dhe nuk jemi as vetë Spanja, por jemi sidoqoftë një vend që sot është në vëmendjen e të gjithëve. Dhe në ndërkohë ky panair i pararend Panairit të madh të Berlinit, ku ne do të marrim stafetën e vendit pritës të vitit të ardhshëm, në Berlin, diçka e paimagjinueshme disa vite më parë dhe prandaj është e rëndësishme që jemi këtu sot dhe prandaj është e rëndësishme t’i japim kësaj përpjekje të gjithë mbështetjen institucionale sepse është edhe një tregues i seriozitetit me të cilin ne e kemi sfidën e Shqipërisë turistike 2030. Kështu që, në këtë kontekst edhe takimet që po bëjmë janë të rëndësishme, ashtu sikundër është shumë inkurajuese që të gjithë ata që sot kërkojnë të takohen me ne, deri jo shumë në kohë, as që nuk kishin asnjë interes për Shqipërinë, kështu që na bën mirë”, tha Rama.

LEXONI GJITHASHTU:

• Kryeministri Edi Rama takim me homologun Pedro Sanchez në Spanjë
• “FITUR 24”, Kryeministri Rama intervistë nga Madridi: Shqipëria në një tjetër nivel