Ish-ministri Malaj: Dy liderët kryesorë politik në Shqipëri krijojnë terren agresiv

Ish-ministri i Financave, Arben Malaj, është shprehur se në Shqipëri dy liderët kryesorë politik, kryeministri Edi Rama dhe ish-kryeministri Sali Berisha, krijojnë terren agresiv.

Komentet Malaj i bëri në emisionin “Barometri” në Euronews Albania, ku komentoi gjetjet e sondazhit, që tregonte se qytetarët i shohin liderët politik si shumë të majtë apo shumë të djathtë.

Ai tha gjithashtu se në botë e majta ose e djathta kanë ndryshuar shumë dhe janë shumë më afër, pasi kanë marrë nga politikat e njëra-tjetrës.

“Sondazhi për nga pikëpamja teknike ka një kampion të madh. Ajo që doja të thoja është se dy liderët politikë klasifikohen si shumë të djathtë dhe shumë të majtë. Kur kjo ndodh, është terreni për agresivitet politik. Gjë që e shofim edhe këtu.

E majta me të djathtën kanë ndryshuar shumë. Nga ato hapsirat e mëdha, tani e majta dhe e djathta janë shumë afër. Edhe e djathta ka marrë nga politikat e majta dhe anasjelltas.

Po ta shikojmë qeverisjen në çdo vend, koha e qeverisjes mes të majtëve dhe të djathtëve është pothuajse e njëjtë. Në disa vende ka qeverisur më shumë e djathta. Pra nuk mund të themi që një krah politik është i keq. Ndarja e majtë dhe e djathtë ka nisur pas Revolucionit Francez”, tha Malaj.

LEXONI GJITHASHTU:

• Partitë dhe liderët politikë të zhvendosur në ekstreme dy vitet e fundit
• Rama nga Shkupi: Liderët e rajonit ta harrojnë historinë, flamuri i vetëm ai i BE