“Fotografia që prek indet e qytetit”, 24-vjeçari nga Durrësi çel ekspozitë në Milano

“Çdokush të ndjekë pasionin e tij, të ecë përpara me të, ta çojë deri në fund, sepse në fund do dalë diku, edhe vetë si unë, pa ndihmën e askujt, as institucioneve”.

Ky është Griseldi, fotografi i vetëm në Shqipëri, që bën “photoprint”-e dhe i riu durrsak që ka hapur së fundmi ekspozitën personale në Milano.

“Kur fotografia prek indet e qytetit” ishte titulli i ekspozitës së Hoxhës hapur në Milano, ku përmes 20 fotografive bardh e zi, ai solli një radiografi të jetës reale të Durrësit e jo vetëm.

Vetëm 24 vjeç, kjo ishte një ngjitje me hapa galopantë në karrierën e tij, që erdhi menjëherë pas pjesëmarrjes së tij në një ekspozitë kolektive.

“Pasi mbaroi periudha e pandemisë, u bë një organizim për të mbledhur fotografi nga 2-vjeçari më i vështirë i Durrësit, nga ku unë kisha pjesën më të madhe të fotografive pasuar me kolegë të tjerë fotografë e gazetarë, që bëmë një ekspozitë kolektive ‘Jeta urbane në Durrës’”, thotë Griseld Hoxha, fotograf.

Ai gjeti përtej Adriatikut atë që i kishte munguar në vendin e tij të lindjes e rritjes.

“Nga ana e institucioneve nuk është se ka pasur përkrahje financiare apo mbështetje”, shprehet ai.

Hoxha ka realizuar katalogun e parë fotografik “Fotografia që prek indet e qytetit”, që u prezantua në Panairin e Librit në Tiranë dhe së shpejti pritet të promovohet edhe në qytetin e Durrësit.