Vuçiç takon deputetin e vetëm shqiptar në Parlamentin serb, çfarë u diskutua

Deputeti shqiptar në Parlamentin e Serbisë, Shaip Kamberi, ka njoftuar se sot në mëngjes në kuadër të konsultimeve për themelimin e qeverisë, ka takuar presidentin e Serbisë, Aleksandër Vuçiç.

Kamberi thotë se presidentit Vuçiç i ka prezantuar kërkesat legjitime të shqiptarëve të Luginës të bazuara në Planin 7 pikësh, ku shton se ripërsëritën qëndrimin e përbashkët se nuk janë të interesuar për asnjë pozitë në nivel qendror, por që konsiderojmë se avancimi i të drejtave të shqiptarëve është interesi i vetëm dhe ai duhet të fillojë nga institucionet shtetërore të nivelit lokal e rajonal.

“Bashkë me Nevzadin, kryetarin e Këshillit kombëtar shqiptar dhe Rahimin, personin e autorizuar të Listës zgjedhore “Beteja politike e shqiptarëve vazhdon – Shaip Kamberi”, në kuadër të konsultimeve për themelimin e qeverisë, takuam presidentin e Serbisë, Aleksanër Vuçiç.

Presidentit Vuçiç i prezentuam kërkesat legjitime të shqiptarëve të Luginës të bazuara në Planin 7 pikësh, ripërsëritëm qëndrimin tonë të përbashkët se nuk jemi të interesuar për asnjë pozitë në nivel qendror por që konsiderojmë se avancimi i të drejtave të shqiptarëve është interesi jonë i vetëm dhe ai duhet të fillojë nga institucionet shtetërore të nivelit lokal e rajonal.

Qasja e shtetit ndaj shqiptarëve duhet të ndryshojë.

Rasti i mjekëve të diskriminuar të Preshevës kërkon zgjidhje urgjente, njëjtë sikur integrimi i shqiptarëve të kualifikuar në polici.

Me presidentin Vuçiç diskutuam edhe për nevojën e privatizimit të Banjës së Bujanocit, rritjes së investimeve në nivel lokal dhe ndaljen e gjuhës së urrejtjes ndaj shqiptarëve.

Shkollat në gjuhën shqipe dhe përmirësimi i infrastrukturës në to do duhej të jenë agjendë e qeverisë së re ndërsa riemërimi i shkollës në Bilaç në Ismail Kadare do duhej të siguronte qasje konstruktive të ministrisë.

Diplomat kërkojnë zgjidhje urgjente. Nga to varet edhe avancimi i pozitës së shqiptarëve të Luginës dhe sigurimi i një perspektive më të mirë për të gjithë.

Institucionet shtetërore në nivel lokal duhet të hapin dyert për integrimin e shqiptarëve. Mbyllja e tyre nënkupton përjashtim të popullsisë shumicë në Luginë të Preshevës.

Beteja jonë në realizim e kërkesave tona vazhdon!”, shkruan Kamberi.

LEXONI GJITHASHTU:

• Borrell: Takimet me Kurtin dhe Vuçiçin në Munih, të pasuksesshme
• Vuçiç intervistë për median ruse: Shoku i mirë njihet në ditë të vështira