Sekuestrohen 9670 euro dhe 3345 paund në portin e Durrësit, procedohet 39-vjeçari

Një 39-vjeçar është proceduar penalisht nga policia kufitare në Portin e Durrësit, pasi iu gjetën një sasi kartmonedhash euro dhe paund të padeklarauara.

Përmes një komunikate zyrtare, policia bën me dije se 39-vjeçarit me banim në Vlorë iu gjetës saktësisht 9670 euro dhe 3345 paund që tentoi t’i nxirrte nga Shqipëria.

Shuma e parave u sekuestrua nga autoritetet e policisë kufitare ndërkohë që materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Mosdeklarimi në kufi i të hollave dhe i sendeve me vlerë”.

“Shërbimet e Policisë Kufitare të portit të Durrësit, në vijim të kontrolleve në hyrje/dalje, të bazuara në analizën e riskut, me fokus parandalimin dhe goditjen e paligjshmërive kufitare, në dalje të Republikës së Shqipërisë, kanë kaluar në vijën e dytë, për kontroll të imtësishëm, shtetasin E. F..

Nga kontrolli fizik, këtij shtetasi iu gjetën 9670 euro dhe 3345 paund që tentonte t’i nxirrte nga vendi ynë, pa i deklaruar në pikën e kalimit kufitar.

Në vijim të veprimeve procedurale për këtë rast, nisi procedimi në gjendje të lirë për shtetasin E. F., 39 vjeç, banues në Vlorë, si dhe u sekuestruan në cilësinë e provës materiale, shumat e parave”, thuhet në njoftimin e policisë.

LEXONI GJITHASHTU:

• U vendosnin logo të markave të shtrenjta rrobave nga Turqia, procedohen babë e bir
• Pse u la e lirë gruaja e Pëllumb Metës, eksperti: Vepruan si organizatë kriminale