VIDEO| Vodhi vetëm në një javë 2 monopatina dhe një automjet, arrestohet autori

Policia e Tiranës ka zbardhur dhe ka dokumentuar 2 raste të vjedhjes së monopatinave dhe 1 rast i vjedhjes së një motomjeti. Blutë e kryeqytetit bëjnë me dije se kanë arrestuar autorin e dyshuar të këtyre tre vjedhjeve të ndodhura vetëm gjatë javës së fundit.

Policia ka publikuar dhe pamjet nga kamerat e sigurisë, ku shihet 28-vjeçari duke kryer vjedhjet në kryeqytet.

Bëhet me dije se vijon puna për zbardhjen e vjedhjeve të tjera që mund të jenë kryer nga ky shtetas.

Materialet procedurale i kaluan Prokurorisë, për veprime të mëtejshme.

“Shërbimet e Komisariatit të Policisë Nr. 3, në vijim të punës për goditjen e veprimtarisë kriminale në fushën e vjedhjes, si rezultat i administrimit të menjëhershëm të kallëzimeve të qytetarëve të ndryshëm, për raste të vjedhjes së monopatinave të tyre, me mbështetjen e inteligjencës policore, kanë organizuar dhe finalizuar operacionin policor të koduar “Mono 3”.

Si rezultat i këtij operacioni u ndalua shtetasi E. K., 28 vjeç, banues në Tiranë.

Nga veprimet hetimore dyshohet se ky shtetas, gjatë javës së fundit, ka vjedhur në zona të ndryshme të Tiranës, 2 monopatina dhe 1 motomjet, të cilat më pas i ka shitur”, thuhet në njoftimin e policisë.