Vula e PD në Gjykatën e Apelit, caktohen 3 gjyqtarët që do ta shqyrtojnë

Gjykata e Lartë vendosi një ditë më parë prishjen e vendimit të Gjykatës së Apelit të 3 Marsit 2023 lidhur me çështjen e vulës së PD dhe dërgimin e kësaj çështje për rigjykim në apel me një tjetër trup gjykuese.

Ditën e sotme është hedhur shorti për gjyqtarët e rinj që do shqyrtojnë çështjen e vulës së PD dhe janë zgjedhur Alma Ahmeti, relatore, Iliba Bizati dhe Elona Tora, gjyqtare.

Vendimi që do të marrë kjo treshe gjyqësore do të jetë një vendim i formës së prerë.

Kolegji i Gjykatës së Lartë vlerësoi se rekursi i paraqitur nga pala kërkuese në këtë gjykim, Partia Demokratike e Shqipërisë, përfaqësuar nga Komisioni i Rithemelimit përmban shkaqe të cilat, e bëjnë të cenueshëm vendimin e dhënë nga Gjykata e Apelit të Juridiksionit të Përgjithshëm.

Tre muaj me parë Gjykata e Lartë vendosi të prishë vendimin e Gjykatës së Apelit të Juridiksionit të Përgjithshëm të Tiranës, me argumentin se “ka lejuar shkelje procedurale që e bëjnë të cenueshëm vendimin e dhënë prej saj”.