FSHF: Biletat për Shqipëri – Kili do të shiten edhe fizikisht në hyrje të stadiumit

Federata Shqiptare e Futbollit ka njoftuar të gjithë tifozët shqiptarë se biletat për ndeshjen miqësore Shqipëri-Kili do të shiten edhe në pikën fizike në hyrje të stadiumit “Ennio Tardini” në Parma.

Përmes një njoftimi për shtyp FSHF bën me dije se biletat do të shiten pasditen e kësaj të enjteje, në fashën orare 15:00-18:00, si dhe të premten që është dita e ndeshjes, në fashën orare 15:00-20:30.

“Përveçse online, biletat do të mund t’i siguroni duke filluar nga dita e sotme në ora 15:00 deri në 18:00 pranë pikës së shitjes, në stadiumin “Ennio Tardini”. Ndërsa nesër që është edhe dita e ndeshjes, pika e biletarisë fizike në hyrje të stadiumit “Ennio Tardini” do të jetë e hapur nga ora 15:00 deri në 20:30.

Të gjithë tifozët që dëshirojnë të jenë prezent dhe të mbështesin Shqipërinë në ndeshjen miqësore ndaj Kilit, që do të zhvillohet në stadiumin “Ennio Tardini” në ora 20:45, kanë mundësinë të blenë biletat e tyre në dy mënyra; fizikisht pranë biletarisë në hyrje të stadiumit “Ennio Tardini” dhe online në linkun: Bileta për ndeshjen Shqipëri – Kili”, thuhet në njoftimin e FSHF.

Pas sfidës me Kilit, Kombëtarja do të luajë një tjetër përballje miqësore me Suedinë. Kjo ndeshje do të zhvillohet më 25 mars në stadiumin “Friends Arena“ të Stokholmit në Suedi, në ora 19:00.

LEXONI GJITHASHTU:

• Kuqezinjtë me ethet e Euro2024/Kombëtarja filloi grumbullimi në Tiranë për miqësoret
• Silvinjo publikon listën me emrat e lojtarëve të ftuar për ndeshjet miqësore