Kryesimi i listave për kandidat në tre qarqe, Monika Kryemadhi: Për të krijuar frymë në ato zona

Kandidimin si të parën në listë për t’u bërë deputete në tre qarqe, Monika Kryemadhi e cilëson si përgjegjësi prej postit si kryetare e Lëvizjes Socialiste për Integrim.

Kryetarja e LSI-së është listuar e para në Tiranë, Fier dhe Elbasan. Mirëpo në intervistë me gazetaren Ilva Tare në Euronews Albania, ajo e komentoi me ironi se “kjo mundësi iu dha nga Edi Rama me ndryshimet e parregullta të Kodit Zgjedhor”.

Kryemadhi tha se kishte vendosur të kryesonte listat e tre prej qarqeve më të mëdha për t’i dhënë “frymë, shans dhe mundësi” të rinjve dhe sidomos grave të këtyre zonave.

E pyetur se mandat e cilit qark do të mbante pas zgjedhjeve nëse rezultatet do të jenë të kënaqshme, Kryemadhi tha se kjo do të varej se kush do të përfitonte nga heqja dorë e mandatit në atë qark.

“Në fakt [për të hequr dorë nga mandati] do të jetë ai qark që do t’i krijojë mundësinë një gruaje apo një të riju për të hyrë në parlament,” – u shpreh Kryemadhi.