Lufta në rripin e Gazës/ Izraeli: S’do t’i ndalim operacionet, pavarësisht tërheqjes

Tërheqja e trupave izraelite nga jugu i Rripit të Gazës nuk do të thotë se operacionet ushtarake kanë përfunduar.

Krerët e ushtrisë izraelite kanë paralajmëruar se trupat po përgatiten për misione të tjera. Ata theksuan se operacioni tokësor në Rafah është ende në agjendë. Izraeli paralajmëroi gjithashtu Iranin, duke thënë se është gati për çdo situatë.

“Hamas rreshti së funksionuari pas operacioneve ushtarake të organizuara nga Gaza. Trupat po largohen nga Khan Junis dhe po përgatiten për misione të tjera. I pamë këto shembuj në misione si ai në Shifa dhe do ta shohim në misionin e ardhshëm në zonën e Rafahut”-tha Yoav Gallant, ministër i Mbrojtjes i Izraelit.

Bisedimet për paqen janë ende në agjendë. Të dielën, Kabineti i Luftës zgjati mandatin e ekipit negociator izraelit për një raund të ri dialogu në Kajro, pavarësisht shqetësimeve se procesi mund të dështonte pas refuzimit të fundit të Hamasit.

Ndërkohë, Izraeli duket se po lejon aksesin e ndihmave humanitare. Mediat izraelite raportuan se të dielën 332 kamionë me ndihma kishin hyrë në enklavën palestineze, numri më i lartë që nga fillimi i luftës.

LEXONI GJITHASHTU: 

• Vaji i ullirit në Spanjë bëhet produkti më i vjedhur nga supermarketet
• Vrasja e Emiljano Ramazanit dhe Regis Runaj, dënohet me burg përjetë Xhuliano Hoxhën