Mbërrijnë 9360 doza të vaksinës Pfizer në Shqipëri

Mbrëmjen e sotme kanë mbërritur 9360 doza të reja vaksinash nga kontrata që qeveria shqiptare ka me kompaninë Pfizer/BioNTech.

Ministrja e Shëndetësisë dhe Mbrojtjes Sociale Ogerta Manastirliu dhe Ministri i Shtetit Arben Ahmetaj ishin të pranishëm në Aeroportin ‘Nënë Tereza’ për të pritur vaksinat ku dhe theksuan se procesi i furnizimit me to do të vijojë.

“Sot kemi edhe 9360 doza, të cilat vijnë nga kontrata jonë me Pfizer. Do të vijojmë me rivaksinimin, pra me dozat e dyta edhe do të përmbyllim gjithë pjesën e parë të vaksinimeve të kryera për stafet mjekësore edhe për të moshuarit në Shtëpitë e të Moshuarve, edhe për të moshuarit +80 vjeç, për të siguruar mbrojtjen e plotë. Nga ana tjetër, prej muajit prill do të vijojmë të kemi dozat sipas kontratës, dhe do të vijojmë me vaksinimin e kategorisë mbi 80 vjeç, për ta shtrirë edhe në grupmoshat e tjera,” – tha Manastirliu.

Ministrja e Shëndetësisë deklaroi se deri tani janë mbi 80 mijë doza vaksine  antiCOVID-19 që kanë mbërritur në vendin tonë, ndërsa priten furnizime të tjera në javët në vijim.

Ndërkohë, qeveria ka bërë një tjetër ndryshim ku lejon përdorimin e vaksinave që nuk janë të certifikuara nga Agjencia Amerikane dhe Europiane e Barnave.

Përmes një akti normativ të datës 12 mars, Këshilli i Ministrave ka miratuar disa ndryshime, ku aprovohen edhe trupa të tjera certifikuese të vendeve që prodhojnë vaksinën anti COVID-19 si dhe përdorimin e tyre në popullatë. Përfshirja e trupave të tjerë certifikues, i hap rrugë edhe vaksinave të tjera, sikurse mund të jenë vaksina ruse dhe kineze.