Takimi i Macron me Vuçiç, Canaj: Franca ka investuar në Serbi, do e mbrojë

Presidenti i Serbisë, Aleksandër Vuçiç, po qëndron në Paris, ku u takua me presidentin e Francës, Emmanuel Macron

Gjatë konferencës për media pas takimit me Macronin, Vuçiç foli për dialogun mes Kosovës dhe Serbisë, që ndërmjetësohet nga Bashkimi Evropian.

Udhëheqësi serb pretendoi se Serbia ka përmbushur “tre gjëra” sa i përket Marrëveshjes në rrugën drejt normalizimit të arritur vitin e kaluar dhe parakusht i saj, sipas tij, ka qenë formimi i Asociacionit të komunave me shumicë serbe në Kosovë, që Kosova nuk e ka përmbushur.

Ish-diplomati Blerim Canaj, e ka komentuar këtë në një intervistë për Euronews Albania, duke thënë se nuk mund të presim që shtetet të prishin marrëdhëniet me shtetet e tjera për shkak se i intereson Kosovës.

Mes tjerash ai theksoi Franca ka investuar miliarda euro në Serbi  dhe sipas tij ajo do e mbrojë investimin e saj.

“Përderisa Vuçiç bën një pazar me një shtet të NATO-s, natyrisht mundësia e lojës me dy karrige ia mundëson këto Vuçiç sidomos kur dihet që Franca nuk e sheh me antipati Serbinë. Nuk mund të presim që shtetet të prishin marrëdhëniet me shtetet e tjera për shkak se ne kemi dëshirë që të na kenë më simpati. Duhet ta shohim si një akt tregtar sepse janë disa miliarda që përfiton Franca.

Duhet ta kemi parasysh që Franca dhe shumë shtete tjera kanë miliarda të investuar në Serbi. Po të vihet puna te një situatë më në krizë, natyrisht që të gjitha shtetet do e mbrojnë investimin e tyre. E kemi parë që Gjermania ka një përafrim me Shqipërinë dhe tani e kemi Francën e cila e ka një përafrim me Serbinë”-tha ai.

LEXONI GJITHASHTU: 

• Tentoi të përdhunonte në një kafene 32-vjeçaren, arrestohet shqiptari
• Formula 1, zv.ministri zbulon projektin: Duhet të kemi pilot me flamurin shqiptar