“Sulmi mund të ketë ardhur nga brenda Iranit”, eksperti: Palët s’duan përshkallëzim

Eksperti i çështjeve ndërkombëtare Kreshnik Osmani tha në një intervistë për Euronews Albania se dyshohet se sulmi në bazën ushtarake të Isfahanit të ketë ardhur nga brenda Iranit.

Sipas tij, fakti që disa orë pas sulmit hakmarrës të Izraelit në Iran nuk kemi një kundërpërgjigje tregon se Teherani dhe Telavivi janë të vendosur për të mos e përshkallëzuar situatën.

“Nga Teherani ka një deklaratë nga komandanti i forcës ajrore që ka thënë se trupa të vegjël më të vegjël se dronët kanë goditur. Këtu është pyetja si është kryer goditja taktikisht nga Izraeli duke qenë se distanca me bazën ushtarake të goditur është 1700 km. Ajo që po mendohet është se ose kanë hyrë kontrabandë nga Kurdistani ose nga Azebajxhani, pra janë goditur nga brenda Iranit jo nga jashtë. Për këtë arsye deri në këto momente duket sikur Teherani dhe Telavivi janë të vendosur për të mos e përshkallëzuar situatën dhe kuptojmë se Uashingtoni ka pasur mundësi dhe fuqi të diktojë ritmin e Telavivit dhe Teheranit për mospërshkallëzim të situatës. Nëse tensionet do përshkallëzohen mendohet që çmimet e naftës të shkojnë në 150 dollarë për fuçi dhe kjo do të ishte katastrofë edhe për Biden që është në vit zgjedhor”, tha Osmani.

LEXONI GJITHASHTU:

• Pse u zgjodh qyteti i Isfahanit në Iran si objektiv i goditjes izraelite
• Izraeli sulmon Iranin, goditet baza ushtarake në Isfahan