Lejuan ndërtime të paligjshme, arrestohet 2 zyrtarët, nisin hetimet për 38-vjeçarin

Dy zyrtarë janë arrestuar ditën e sotme në Kukës pasi lejuan ndërtimin e objekteve të paligjshme dhe shpërdoruan detyrën.

Gjithashtu procedohen penalisht 3 shtetas të tjerë, të cilët gjatë këtij operacioni, u konstatua se kishin ndërtuar në kundërshtim me ligjin.

Policia vuri në pranga shtetasit U. D., 40 vjeç, banues në fshatin Golaj, me detyrë administrator i njësisë administrative Golaj dhe B. U., 32 vjeç, banues në fshatin Vlahën, me detyrë inspektor i IMTV, njësia administrative Golaj.

Sakaq kanë nisur hetimet për shtetasin K. L., 38 vjeç, banues në fshatin Zahrisht, me detyrë inspektor i IMTV, bashkia Has, si dhe për shtetasit Z. D., M. M. dhe F. K..

Nga hetimet dyshohet se shtetasit U. D., B. U. dhe K. L., duke shpërdoruar detyrat, kanë lejuar ndërtime të paligjshme, në territoret e njësisë administrative Golaj dhe bashkisë Has.

Në vijim, nga verifikimet rezultoi se 3 shtetasit e tjerë të proceduar kishin ndërtuar objekte, pa leje, në këto zona.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm, Kukës.

LEXONI GJITHASHTU: 

• Fshehu aksidentin e shkaktuar nga e bija, arrestohet efektivi në Gjirokastër
• “Gabim ligjor që trupi i vajzës i është kthyer familjes së bashkëshortit” -Hazizaj