Rezoluta anti-korrupsion e prezantuar nga Rama, reagon për Euronews ambasada e SHBA

Partia Socialiste dhe kryeministri Edi Rama propozuan të martën një draftrezolutë për thellimin e reformave për mirëqeverisjen, sundimin e ligjit dhe luftën kundër korrupsionit.

Në lidhje me këtë nismë të ndërmarrë nga qeveria ka ardhur dhe reagimi i parë nga ambasada e Shteteve të Bashkauara të Amerikës në Tiranë.

Në një reagim të dhënë për Euronews Albania, zyra e shtypit të ambasadës, e ka cilësuar propozimin si premtues, duke e mbështetur atë.

Ambasada amerikane thekson se nxit pjesëmarrjen e të gjitha palëve në këtë proces dhe shton se po pret me kënaqësi rezultatet e para.

“Propozimi për të çuar përpara përpjekjet e Shqipërisë që lidhen me qeverisjen e mirë, sundimin e ligjit, dhe anti-korrupsionin është premtues. Si partnerë në mbështetje të Shqipërisë prej kohësh, Shtetet e Bashkuara përgëzojnë përpjekjet që bazohen në suksesin e reformave të mëparshme ndërkohë që bëjnë bashkë grupe politike, shoqërinë civile, biznesin dhe të tjerë për të çuar përpara reformat kritike që janë të nevojshme për rrugën e Shqipërisë drejt anëtarësimit në BE dhe bashkësinë euro-atlantike. Nxisim pjesëmarrjen e të gjithë shqiptarëve që synojnë të përmirësojnë të ardhmen e Shqipërisë dhe presim me kënaqësi të shohim rezultatet e dala nga një proces transparent dhe bashkëpunues”, thuhet në reagim.

LEXONI GJITHASHTU:

• ‘Shqipëria 2030 në BE’| Draft-rezoluta e prezantuar në mbledhjen e Grupit të PS
• Rama: Nuk mbaj asnjë burrë me para të vjedhura në karrige, kur vjen ora të thirret
• Rama: Çdo anëtar i familjes së PS që bën korrupsion është një tradhtar i dyfishtë