“Ishim 1 Kore e Veriut”-Rama nga Gjermania: Për Shqipërinë dielli lind nga Perëndimi

Kryeministri Edi Rama ka marrë pjesë sot në panelin “Perspektiva Europiane e Ballkanit Perëndimor”, i cili u zhvillua në Aachen të Gjermanisë.

Gjatë fjalës së tij atje, Rama foli për procesin e integrimit të Shqipërisë në Bashkimin Europian, i cili sipas tij është një prioritet për vendin tonë.

Rama tha se populli shqiptar është populli më pro-europian në Europë dhe shtoi se për Shqipërinë dielli lind nga Perëndimi.

“Nuk flas gjermanisht, shumë e vështirë për mua dhe jam mjaft i nderuar që të flas në këtë forum. Po ashtu është kënaqësi që të marrim një moment për të folur për një vend të Europës që pret të bëhet pjesë e BE-së, megjithëse është në qendër të Europës.

Ishim një Kore e Veriut në mes të Europës për shumë e shumë vite. Në të njëjtën kohë u bëmë i vetmi vend që pas rënies së komunizmit nuk kishte një parti komuniste dhe ende nuk e kemi një. As parti komuniste dhe as diçka të ngjashme me të. Izolimi ynë tejet i dhimbshëm na bëri që të jemi ai vend që sot të jetë vendi më pro-europian në Europë. Për ne të jesh pjesë e BE është aq thelbësore sa ishte për etërit themelues që nisën të ndërtonin BE.

Të jesh pjesë e BE për ne është të jesh pjesë e një bashkësie paqeje. Në shumë realitete BE konsiderohet si bankomat, për ne nuk është kështu. S’ka të bëjë me paratë, ka të bëjë me një parametër paqeje të mbështetur në vlera. Parametër sigurie mbështetur në vlera. Nuk e di se çfarë do të ndodhë me BE në vitet që vijnë, por është e sigurt se edhe nëse BE zhduket, Shqipëria do vazhdojë përpjekjet për të qenë pjesë e BE. Për Shqipërinë dielli lind nga Perëndimi”, tha Rama.

LEXONI GJITHASHTU:

• Bardhi thirret në SPAK për “Xibrakën”, reagon Rama: Drejtësia vepron me ligje
• Bardhi komenton Rezolutën e PS: Rama nuk dëshiron të ndërtojë një shtet europian