Fondi për banesa sociale, ndërtuesit mund ta japin masën 3% në projekte të ndryshme

Masa prej 3% për strehimin social mund të zhvendoset në projekte të ndryshme nga ndërtuesi.

Tashmë në fletoren zyrtare është publikuar ndryshimi në përcaktimin e rregullave për kontributin e sektorit privat në krijimin e fondit publik të banesave sociale, i cili për herë të parë bën të mundur që një ndërtues në momentin që aplikon për leje ndërtimi, të jap sipërfaqen që i detyrohet shtetit në projekte të tjera që janë të përfunduara.

“Në rast pamundësie për ta dhënë në sipërfaqen ndërtimore  të banimit që ndërtohet, subjekti privat e jep atë  menjëherë në një sipërfaqe tjetër ndërtimore banimi, në përputhje me normat e projektimit të banesave, përfunduar dhe certifikuar me dokumentin e pronësisë, duke e ekuivalentuar në vlerë monetare, sipas çmimit referues të pasurisë paluajtshme “ndërtesa” për zonën ku po ndërtohet, për të cilin është dhënë leja ndërtimore”, thuhet në njoftimin e Ministrisë së Ekonomisë, Kulturës dhe Inovacionit.

Në kontratën paraprake midis njësisë së vetëqeverisjes vendore dhe subjektit që paraqet kërkesën për leje zhvillimi dhe ndërtimi, përcaktohet mënyra e përfitimit të fondit publik të banesave sociale, e cila mund të jepet edhe në vlerë monetare sipas çmimit referues të pasurisë së paluajtshme. Në këtë rast, fondi kalon nga investitori në llogarinë e posaçme të njësisë së vetëqeverisjes vendore, në favor të fondit publik të banesave sociale.

LEXONI GJITHASHTU:

• Nis shembja e banesave dhe objekteve që preken nga projekti i Unazës së Madhe
• Banorët e 5 Majit: Të prishen banesat kur të zgjidhet strehimi