Basha për kamerat inteligjente: Nuk bëjnë punë nëse nuk i japim rrogë policëve

Ish-drejtuesi i policisë, Faik Basha komentoi në emisionin GoodMorning Albanians në Euronews Albania sistemin e kamerave inteligjente që do të instalohen në njëzet qytete të vendit. Sipas tij, pengesë e punës së policëve nuk kanë qenë kamerat, por pagesat e ulëta.

“Ne kemi punonjës policie shumë të aftë dhe që kërkojnë të bëjnë detyrën, por kanë pasur pengesa. Nuk është se kamera ka qenë pengesë. Sigurisht tani i ndihmon. Nëse ne, punonjësit të policisë nuk i japim rrogë. Nëse punonjësi i policisë niset për punë, por ndërkohë në shtëpi nuk ka çfarë t’i japë fëmijëve për të ngrënë, ne nuk i bëjmë dot gjë as me kamera. Nëse kamerat do t’i vendosim në dispozicion të grupeve kriminale aq më keq akoma, siç kemi bërë me burimet e informacionit”, tha Basha.

Ai u shpreh se ka një mënyrë tjetër për të ndihmuar më mirë në funksionimin e policisë dhe hapi i parë është dekriminalizimi.

“Ne duhet të pastrojmë një herë policinë. Duhet ta heqim atë drejtorin e policisë që e ka makinën 100 mijë euro. Unë kam dhe një ide tjetër, ku një pjesë e mirë e mjeteve, parave dhe pajisjeve që do të bllokohen nga grupet kriminale t’u jepen policëve”, u shpreh.

LEXONI GJITHASHTU:

• Cilat janë 20 qytetet e Shqipërisë që do monitorohen nga kamerat
• Policia e Kosovës gjen kamera në një rrugë malore në kufirin lindor me Serbinë