Zgjedhjet në Britani lënë Brexit në hije, Starmer premton lidhje të reja me BE

Mbretëria e Bashkuar u drejtohet zgjedhjeve të para që nga dalja nga Bashkimi Evropian. Por dy kandidatët kryesorë në garën për pushtet kanë zgjedhur ta devijojnë Brexit në fushatën elektorale.

“Të dyja partitë kryesore janë përpjekur ta diskutojnë Brexit sa më pak. Arsyeja në radhët e konservatorëve është se Boris Johnson u zgjodh duke premtuar realizimin e Brexit, por që prej atëherë votuesit kanë qenë të zhgënjyer me rezultatet e tij. Ndaj Rishi Sunak nuk do që të tërheqë vëmendje gjatë fushatës. Edhe tek laburistët, Keir Starmer po përpiqet të sigurojë shumicën në Parlament, pasi votoi pro Brexit në 2016”, tha studiuesi Joel Reland.

Lideri laburist, Keir Starmer, pranë majës së pushtetit, ka deklaruar se do të ringjallë lidhet me BE-në që janë pakësuar që prej Brexit. Por ai nuk ka dhënë detaje dhe ka përjashtuar aderimin në tregun e përbashkët evropian, unionin doganor dhe riaktivizimin e lëvizjes së lirë. Por Brukseli ka pak gjasa të lejojë Britaninë të zgjedhë sipas dëshirës.

“Mua më duket se laburistët e kanë portretizuar veten si të izoluar duke thënë vazhdimisht gjëra që nuk do të bëjnë. Ata kanë kufizuar hapësirën për manovra dhe kanë kufizuar aftësinë e tyre për të negociuar një akord më të mirë me BE-në”, tha nëndrejtori i Qendrës për Reformat Evropiane, Ian Bond.

Me luftën që ka shpërthyer në dyert e Evropës, analistët thonë se ka gjasa që qeverisja laburistë të kërkojë më shumë bashkëpunim me BE-në për mbrojtjen.

Mbretëria e Bashkuar është aleate kyçe e NATO-s dhe ndjek të njëjtat linja me bllokun sa i takon mbështetjes për Ukrainën. Por ajo mund të kërkojë të bashkëpunojë edhe për çështje të tjera.

“Një seri nismash të BE-së në këtë fushë janë fokusuar në përforcimin e prodhimit industrial të mbrojtjes. Por shumë prej këtyre nismave dhe projekteve nuk përfshijnë vendet e përmendura që qëllimisht fokusohen në industritë e shteteve anëtare. Ndaj do të jetë një çështje e vështirë për t’u negociuar, nëse Britania mund të bëhet pjesë e tyre apo nëse dëshiron të bëhet pjesë”, tha analistja Olivia O’Sullivan.

LEXO GJITHASHTU:

• Lajmet e rreme godasin Britaninë dhe Francën përpara zgjedhjeve
• Kush pritet të fitojë zgjedhjet në Britaninë e Madhe, publikohet sondazhi final