Lëvizte me 8 milionë euro kokainë në makinë, arrestohet 52-vjeçari shqiptar në Itali

Guardia di Finanza në Torino ka arrestuar një pesëdhjetë e dy vjeçar me kombësi shqiptare, të cilit iu gjendën në automjetin që po lëvizte 80 kg kokainë. Sipas hipotezave hetimore, droga do të shitej ne rajonet e veriut të Italisë, kryesisht në Piemonte dhe Lombardi.

Kjo sasi lënde narkotike, nëse do të hidhej në treg me çmim pakice, mund t’i kishte sjellë shqiptarit të ardhura të paligjshme prej të paktën 8 milionë eurosh.

Mëngjesin e 9 korrikut, në provincën e Bergamos policia identifikoi dhe ndaloi një makinë të dyshimtë. Pas sjelljes agresive të shqiptarit, mjeti iu nenshtrua një kontrolli më të imtësishëm, nga ku u konstatua edhe lënda narkotike.

Aktiviteti i kryer nga efektivët Guardia di Finanza bëri të mundur më tej  gjetjen dhe sekuestrimin e gjithsej 74 blloqeve me kokainë. Në përfundim të kontrolleve shqiptari u arrestua për veprën penale të trafikimit dhe mbajtjes së paligjshme të lëndëve narkotike.

Sekuestrimi i madh i drogës vjen në vijim të analizës dhe aktivitetit të thelluar në lidhje me zbulimin e rrugëve kryesore që përdorin trafikantët e drogës në territorin italian për të furnizuar me lëndë narkotike zonat urbane të veriut të Italisë.

LEXO GJITHASHTU:

• Shpallet në kërkim drejtori i shkollës artistike Durrës, për shpërndarje droge
• U kapën me armë, municione dhe lëndë narkotike, 15 të arrestuar në Durrës