Shkelën perimetrin e sigurisë|Policia bllokon 3 mjete lundruese, gjobiten drejtuesit

Tre mjete lundruese janë bllokuar në Vlorë, pasi shkelën perimetrin e sigurisë duke rrezikuar jetën e pushuesve.

Secili nga drejtuesit e këtyre mjeteve lundruese u ndëshkua me masë administrative prej 100,000 lekësh të rinj.

Po ashtu sipas njoftimit të Policisë, u bllokua edhe një skaf që ushtronte aktivitetin pa licencë.

Ndërkohë Policia i bën thirrje qytetarëve që të denoncojnë çdo shkelje, duke i siguruar ata për ruajtjen e anonimatit.

Njoftimi i Policisë:

Vlorë-Shkelën perimetrin e sigurisë, duke rrezikuar jetën e pushuesve, Policia Kufitare dhe Njësia Policore Detare bllokojnë 3 mjete lundruese.

Gjatë monitorimit të hapësirës detare në të gjithë qarkun, u bllokua edhe një mjet lundrues skaf që ushtronte aktivitetin pa licencë.

Si rezultat i monitorimeve të pandërprera, me qëllim rritjen e parametrave të sigurisë së pushuesve, Policia Kufitare dhe Njësia Policore Detare, në bashkëpunim me patrullat tokësore, bllokuan 3 mjete lundruese (2 Jet Ski dhe 1 skaf), pasi drejtuesit e tyre shkelën perimetrin e sigurisë ujore në plazhin e Qeparosë dhe të Karaburunit, duke vënë në rrezik jetët e pushuesve. Secili nga drejtuesit e këtyre mjeteve lundruese u ndëshkua me masë administrative prej 100,000 lekësh të rinj.

Gjithashtu, shërbimet e Policisë Kufitare, në bashkëpunim me Njësinë Policore Detare, ndërhynë menjëherë në plazhin e Borshit, duke bllokuar një tjetër mjet lundrues skaf, pasi përdorej për të ushtruar aktivitetin pa licencë. Drejtuesi i tij u ndëshkua me masë administrative prej 110,000 lekësh të rinj.

Policia Kufitare, në bashkëpunim me Njësinë Policore Detare dhe patrullat tokësore, vijon monitorimin dhe kontrollin e të gjitha zonave bregdetare dhe fton qytetarët që të denoncojnë në numrin pa pagesë 112 çdo rast paligjshmërie, duke iu garantuar anonimat, reagim të shpejtë dhe profesional.

LEXONI GJITHASHTU:

• 32 mjete lundruese të bllokuara nga Ksamili në Velipojë, gjobiten drejtuesit
• Sekuestrohen 5 mjete lundruese e 4 jet ski pa dokumente në Vlorë, Durrës e Velipojë