Dyndje vizitorësh në kalanë e Gjirokastrës, 100 mijë turistë gjatë këtij viti

Kalaja e Gjirokastrës ka shënuar rritje të numrit të vizitorëve. Drejtoria Rajonale e Trashëgimisë Kulturore Gjirokastër thotë se deri në muajin korrik të këtij viti janë 100 mijë vizitorë, vendas e të huaj.

Bëhet fjalë për 31.000 vizitorë më shumë se e njëjta periudhë e një viti më parë.

Kjo e bën Kalanë e Gjirokastrës, një nga destinacionet turistike më të vizituar dhe pëlqyer prej turistëve nga gjithë bota në vendin tonë.

Kalaja është një histori e lidhur me qytetin e Gjirokastrës dhe përmendet për herë të parë si qytet dhe kështjellë në vitin 1336.

Duke filluar nga viti 1968, skena e gurtë e kalasë së Gjirokastrës pret instrumentistët, këngëtarët dhe valltarët e folkut në kuadër të Festivalit Mbarëkombëtar Folklorik të Gjirokastrës. Kalaja e gurtë është edhe një prej pikave më tërheqëse në guidat e grupeve turistike vendase dhe të huaja që vizitojnë Gjirokastrën e mbrojtur nga UNESCO.