Dita Botërore Kundër Kancerit, OBSH: Brenda 20 vitesh rastet pritet të rriten me 80%

Brenda 20 vitesh, rastet e të prekurve me kancer do të rriten me mbi 80% kryesisht në vendet me të ardhura të ulëta dhe të mesme. Në këtë përfundim ka arritur Organizata Botërore e Shëndetësisë në ditën ndërkombëtare kundër kancerit një nga sëmundjet e cila çdo ditë po merr gjithnjë e më shumë jetë njerëzish.

Vendet e varfra thuhet në raportin e OBSH nuk mund të investojnë në parandalim dhe kujdesje duke u bërë thirrje komuniteteve ndërkombëtare të zgjidhin pabarazitë e papranueshme sa i përket shërbimeve të ofruara. Në vendet më të pasura, trajtimi më i mirë i  kësaj sëmundjeje kancerit çoi në një rënie prej 20 për qind të niveleve të vdekshmërisë midis viteve  2000 dhe 2015.

[instagram_feed=B8JKx2TIsrT]

Në raportin e OBSH-së nënvizohet se nëse njerëzit kanë qasje në sistemet e kujdesit parësor dhe referimit, kanceri mund të zbulohet më herët, të trajtohet në mënyrë efektive dhe të kurohet. Qoftë Organizata Botërore e Shëndetit, por edhe Agjencia Ndërkombëtare e Kërkimit mbi Kancerin  pikërisht në ditën ndërkombëtare kundër kësaj sëmundje publikuan dy raporte në përpjekje për t’u bërë thirrje qeverive që të bëjnë më shumë kërkime , të ndërmarrin më shumë politika dhe programe për të përmirësuar kontrollin e kancerit.

“Të paktën 7 milionë jetë mund të shpëtohen në dekadën që vjen, dhe kjo mund të realizohet duke identifikuar shkencën më të përshtatshme për situatën e secilit vend, duke bazuar përgjigje të forta për kancerin në mbulimin shëndetësor universal, dhe duke mobilizuar palë të ndryshme të interesuara për të punuar së bashku,” u shpreh kreu i OBSH-së.

Në raportin e publikuar, OBSH nënvizon një gamë të gjerë të ndërhyrjeve për të parandaluar rastet e reja të kancerit. Këto përfshijnë kontrollin e përdorimit të duhanit (përgjegjës për 25% të vdekjeve nga kanceri), vaksinimin kundër hepatitit B për të parandaluar kancerin e mëlçisë, etj.

Sfida do të jetë që vendet të zgjedhin trajtime që konsiderojnë balancimin e kostove, fizibilitetit dhe efektivitetit. Çdo qeveri ka për detyrë të zgjedhë terapitë e duhura inovative për kancerin,  shumë prej të cilave janë shumë efektive dhe të përballueshme, mund të japin përfitime për sëmundjen pa shkaktuar vështirësi financiare.