Deputeti i Partisë Socialiste paraqitet në SPAK, zbardhet arsyeja

Një tjetër deputet është parë në mbientet e Prokurorisë së Posaçme mëngjesin e kësaj të marte.

Bëhet fjalë për deputetin e Partisë Socialiste, Jurgis Çyrbja.

“Nuk e di pse jam thirrur…” –ka thënë fillimisht deputeti pasi është pyetur për arsyen e paraqitjes në SPAK.

Burime jo zyrtare bëjnë me dije se ligjvënësi socialist po pyetet për një kallëzim të Edi Palokës në zgjedhjet e 2021.

Paloka e akuzonte për shpërdorim detyre në kohën kur drejtonte hipotekën e durrësit.

Në atë kohë drejtues politik i qarkut Durrës, Edi Paloka, ka çuar në SPAK deputetin aktual për “shpërdorim detyre”, për firmosjen brenda të njëjtës ditë të dy praktikave për të njëjtën pronë, por në dy emra të ndryshëm duke realizuar kështu mbivendosje prone.

Në të njëjtën kohë, Paloka pretendoi se edhe javët e fundit të fushatës Çyrbja ka qenë i pranishëm në Kadastrën e Durrësit duke shpërndarë çertifikata dhe legalizime, njësoj sikur të ishte ende drejtor Hipoteke.

Deputeti demokrat tha në atë kohë në një deklaratë për mediat, se në SPAK janë depozituar kallëzimet penale për drejtuesit e institucioneve vendore në Durrës që janë përfshirë në blerjen e votave, si dhe një seri shtetasish që duke shpërndarë para apo përmes kërcënimeve synuan të tjetërsojnë vullnetin e votuesve.

LEXONI GJITHASHTU:

• Deputeti i Partisë Demokratike paraqitet në SPAK
• SPAK ka bërë hetim jo-etik, Berisha dorëzon në gjykatë kundërshtimin e provave