Uzuni humbet sfidat me Çekinë dhe Gjeorgjinë, ja kush e zëvendëson

Në prag të ndeshjeve të Nations League ndaj Çekisë dhe Gjeorgjisë, Kombëtarja shqiptare ka pësuar një tjetër ndryshim.

Departamenti i Komunikimit në FSHF njoftoi se sulmuesi Myrto Uzuni ka përjetuar një problem muskulor gjatë ndeshjes së fundit me klubin e tij.

Ai u paraqit në Kombëtare për t’u nënshtruar analizave mjekësore, ku një rezonancë magnetike zbuloi një dëmtim në muskujt e pulpës së djathtë.

Si rezultat, Uzuni nuk do të jetë i disponueshëm për ndeshjet e tetorit dhe do të kthehet në klubin e tij për të vazhduar programin e rikuperimit.

Trajneri Silvinjo ka vendosur të thërrasë sulmuesin Indrit Tuci si zëvendësim, i cili pritet të mbërrijë sot në Tiranë për t’u bashkuar me ekipin në përgatitjet për këto dy ndeshje të rëndësishme.