“Gërdeci”, Mediu kundërshton ekspertët, akuza gjykatës për njëanshmëri

Fatmir Mediu vijon të kundërshtojë ekspertizën ekonomiko-financiare të marrë parasysh nga SPAK në procesin penal për tragjedinë e Gërdecit. Ish-ministri, i marrë i pandehur për shpërdorim detyre, akuzon gjykatën për njëanshmëri.

Në seancën që u mbajt këtë të martë Gjykata e Posacme ka rrëzuar kërkesën e avokatëve mbrojtës për kryerjen e një akti të ri ekspertimi për përllogaritjen e dëmit.

Avokatët e Mediut i kërkuan gjykatës që të urdhëronte një riekspertim pjesor për kostot e dëmit ekonomiko-financiar të demontimit, por gjyqtarja Irena Gjoka e refuzoi kërkesën.

Avokatët kërkuan në seancën që të merret si provë një ekspertizë private, e përgatitur nga ana e tyre, dhe të bëhet pjesë e fashikullit një memo me kundërshtimet e tyre.

Ish-ministri i mbrojtjes, Fatmir Mediu, është marrë i pandehur për shpërdorim detyre me dyshimin se ka kryer shkelje në lidhje me procesin e çmilitarizimit dhe çmontimit të municioneve në ambientet e ish “Brigadës së Tankeve” në Gërdec.