U arrestua 2 ditë më parë, ish-deputeti Jurgis Çyrbja del sot në GJKKO

Ish-deputeti socialist, Jurgis Çyrbja është paraqitur mëngjesin e kësaj të marte në ambientet e Gjykatës së Posaçme për t’u njohur dhe verifikuar me kushtet e zbatimit të masës së sigurisë “arrest me burg”.

Seanca është shtyrë për disa orë për Jurgis Çyrbjan dhe Ahmet Mashën, kjo sepse avokatët kërkuan të njihen me aktet hetimore.

Ish-deputeti socialist që dha dorëheqjen pak ditë më parë akuzohet nga SPAK për shpërdorim detyre në disa raste në kohën kur ka drejtuar hipotekën e Durrësit.

Ditën e hënë SPAK e ka njohur me 7 veprat penale që rëndojnë mbi Çyrbjan, përfshirë:

i. “Zbulimi i akteve ose të dhënave sekrete”, kryer më tepër se një herë, parashikuar nga neni 295/a/1 i Kodit Penal, pa autor.

ii. “Tregimi i sekretit shtetëror nga shtetasit” kryer nga shtetasi Jurgis Çyrbja më tepër se një herë, parashikuar nga neni 295/1 i Kodit Penal.

iii. “Përkrahja e autorit të krimit”, kryer nga shtetasi Jurgis Çyrbja, më tepër se një herë, parashikuar nga nenet 302/1/2 të Kodit Penal.

iv. “Tregimi i sekretit shtetëror nga shtetasit”, kryer në bashkëpunim nga shtetasit Jurgis Çyrbja, dhe Ahmet Masha, parashikuar nga nenet 295/1 dhe 25 të Kodit Penal.

v. “Përkrahja e autorit të krimit”, kryer në bashkëpunim nga shtetasit J. Ç., dhe Ahmet Masha, parashikuar nga nenet 302/1 dhe 25 të Kodit Penal.

vi. “Korrupsioni aktiv në zgjedhje”, kryer nga shtetasi J. Ç. parashikuar nga neni 328 i Kodit Penal, si dhe

vii. “Korrupsioni pasiv në zgjedhje”, kryer nga shtetasi A. H. parashikuar nga neni 328/b i Kodit Penal.

LEXONI GJITHASHTU:

• Dalin pamjet, Ja si u arrestua ish deputeti i PS, Jurgis Çyrbja
• Arrestimi i Jurgis Çyrbjas, SPAK zbardh akuzat që rëndojnë mbi ish-deputetin