“Punojnë 6 muaj, paguhen një vit” – Oferta për punonjësit e turizmit

Punonjësit sezonalë në sektorin e turizmit do të paguhen gjatë gjithë vitit. Për të bërë të qëndrueshëm bizneset turistike, qeveria dhe operatorët turistikë po diskutojnë mundësitë që për 6 muaj të vitit, punonjësit të paguhen për shërbimin që do të kryejnë dhe 6 muaj të tjerë të marrin pagë minimale.

Kjo formë mbështetjeje sugjerohet në strategjinë e re Kombëtare të Turizmit për vitet 2024-2030, me synim ruajtjen e fuqisë punëtore dhe zhvillimin e mëtejshëm të bizneseve turistike.

“Ky kuadër duhet të fokusohet te punonjësit sezonalë në industrinë e turizmit, duke siguruar që ata të marrin kompensim të përshtatshëm kur nuk janë duke punuar në mënyrë aktive, si dhe duhet të stimulojë punëdhënësit që të mbajnë forcën e tyre punëtore për sezonet pasuese”, theksohet në Strategji.

Nisma përfshin përcaktimin e qartë të grupeve të synuara, periudhës së punës pa ndërprerje, por edhe kohës së mbështetjes financiare, sigurimet shoqërore dhe shëndetësore edhe ripunësimin.

Në vitin 2023, numri i të punësuarve në turizëm ishte 43 mijë, ndërsa me planin e hartuar deri në vitin 2030, ky numër do të arrijë në 74 mijë.

LEXONI GJITHASHTU:

• Turizmi, tranzicioni dhe roli i grave në shoqëri, Linda Rama flet për Soon Magazine
• Dita Botërore e Turizmit, OKB: Sektor që nxit paqen dhe tolerancën mes kombeve