Grabitja e 5,4 mln eurove në Rinas, GJKKO jep vendimin e dënimit për Talo Çelën

Gjykata e Posaçme kundër Korrupsionit dhe Krimit të Organizuar ka dënuar me 18 vite burg në mungesë Talo Çelën për grabitjen e 5.4 milionë eurove në aeroportin ndërkombëtar të Rinasit, në prill të 2019.

Prokuroria e Posaçme në pretencën e shpallur pak ditë më parë kishte kërkuar dënimin me 19 vjet burg për të shumëkërkuarin.

Talo Çela është një nga personat më të shumëkërkuar në Shqipëri. Ai u shpall në kërkim në kuadër të operacionit të koduar “Plumbi i Artë”, që çoi në kapjen e Nuredin Dumanit, Henrik Hoxhajt si dhe të disa personave të tjerë, pjesë e botës së krimit.

Për ngjarjen e 2019, GJKKO në tetor të vitit të shkuar dënoi me 122 vite burg 7 të pandehurit e grupit kriminal.

Klement Çala u dënua me 20 vite, ndërsa gjashtë të tjerët Oltion Veseli, Renaldo Sulaj, Saimir Cela, Oltion Pikli, Alkon Bengasi dhe Eldi Çala me  17 vite burg. Të dënuarit po e vuajnë dënimin në një burg të sigurisë së lartë.

LEXONI GJITHASHTU:

• 122 vite burg për supergrabitjen në Rinas, Talo Çela gjykohet veçmas
• Grabitja e 4.5 milionë eurove në Rinas, SPAK shpall pretencën për Talo Çelën