Gjokutaj në protestën kundër SPAK, publikon kallëzimin e bërë për arrestimin e Metës

Genc Gjokutaj, avokati i ish-presidentit Ilir Meta, mori pjesë në protestën që Partia e Lirisë zhvilloi kundër Prokurorisë së Posaçme. Në fjalën e tij, Gjokutaj bëri me dije se ai ka dorëzuar këtë të premte një kallëzim ndaj Policisë së Shtetit, Ministrit të Brendshëm, Drejtorit të Përgjithshëm të Policisë së Shtetit dhe Forcave Operacionale, lidhur me arrestimin e Ilir Metës. Sipas tij, ish-kreu i shtetit nuk duhet të arrestohej në atë mënyrë të paligjshme, të cilën e cilësoi si nnjë rrëmbim.

Ai shtoi se Partia e Lirisë është në një luftë me drejtësinë e kapur, e cila ka si synim të godasë liderët e opozitës.

“Jemi në luftë me një drejtësi të kapur, e cila nuk ka lënë dispozita të nenëve të kodeve të procedurës dhe kodit penal pa shkelur me qëllimin e vetëm izolimin e opozitës. Sot kemi depozituar në rrugë zyrtare kallëzimin ndaj Policisë së Shtetit, Ministrit të Brendshëm, Drejtorit të Përgjithshëm të Policisë së Shtetit me rastin e rrëmbimit kriminal që iu bë një nga liderët e opozitës, zotit Meta. Ata kanë shpërdoruar detyrën dhe kanë konsumuar të gjitha krimet e mundshme që mund të kryej një shtetar dhe një punonjës i policisë në detyrë. I kemi kërkuar edhe godinës përballë, SPAK dhe GJKKO, për ta deklaruar këtë ndalim të paligjshëm, por ata jo vetëm që nuk e kanë hyrë në këtë pikë, por as nuk e kanë trajtuar fare në vendimet e tyre. Ndaj ne jemi të detyruar të denoncojmë me forcë këtë rrëmbim,” tha Gjokutaj.

LEXONI GJITHASHTU:

• Protesta e Partisë së Lirisë: Blindohet SPAK, policia rrethon godinën
• “Jo drejtësi me regji”, nis protesta e Partisë së Lirisë para SPAK