“Superheronjtë” në Kosovë gëzojnë fëmijët e shtrirë në spitalin e pediatrisë

Superheronjët vizituan dhe këtë vit repartin e pediatrisë në Qendrën Klinike Universitare të Kosovës. Ata përmes lëshimit me litar ofruan shfaqje për fëmijët e shtrirë në këtë klinike. 

Personazhe të shumtë të filmave të preferuar të fëmijëve u pëlqyen shumë nga të pranishmit. Por, ata që e shijuan më shumë ishin fëmijët. 

Spektatorët nuk munguan as nga dhomat e ballkonet e pediatrisë ku edhe janë të shtrirë shumë fëmijë. 

Sipas drejtuesit të kësaj klinike, ky aktivitet është një çlirim shpirtëror për fëmijët e hospitalizuar. 

“Ky aktivitet është mjaft i rëndësishëm sidomos për fëmijët të cilët janë të hospitalizuar ne klinikën e Pediatrisë për ardye se ka disa fëmijë me sëmundje kronike që qëndrojnë gjatë. Ky aktivitet është një çlirim i gjendjes shpirtërore”, u shpreh Violeta Grajçevci Uka, drejtore e Pediatrisë.

Pjesë e këtij aktiviteti përveç karaktereve të njohura të filmave, ishin edhe forcat e ushtrisë së Kosovës. Performanca e tyre u duartrokit me të madhe nga të vegjlit dhe të pranishmit e tjerë.

Superheronjët në pediatri tashmë është bërë një aktivitet i përvjetshëm dhe mbështetet nga institucione e kompani private. Në fund për të vegjlit u ndanë edhe dhurata.