Vota e emigrantëve, Celibashi në Kuvend: Kur pritet të nis regjistrimi online

Kryetari i Komisionit Qendror të Zgjedhjeve (KQZ), Ilirjan Celibashi, deklaroi në Nënkomisionin për Diasporën dhe Migracionin se procesi i regjistrimit të emigrantëve për zgjedhjet parlamentare të 11 Majit 2025 do të fillojë më 11 Janar.

Ai gjithashtu konfirmoi se procesi i përgatitjes për votimin nga jashtë po zhvillohet sipas parashikimeve të Kodit Zgjedhor dhe se janë miratuar të gjitha aktet normuese të nevojshme për regjistrimin dhe përgatitjen e listës së zgjedhësve.

Celibashi theksoi rëndësinë e bashkëpunimit të partive politike për të siguruar realizimin në kohë të procesit.

Përsa i përket platformës për regjistrimin e votuesve, Celibashi shtoi se është në fazën finale të ndërtimit dhe se pritet një demonstrim i funksionaliteteve të sistemit para Krishtlindjeve, me qëllim që ai të jetë funksional dhe të nisë regjistrimi më 11 Janar.

Sa i përket tarifës së shërbimit postar për këtë proces, Celibashi tha se ka pasur diskutime me qeverinë dhe se është arritur një marrëveshje që shteti shqiptar të mbulojë këto shpenzime. Ai shtoi se në buxhetin e vitit të ardhshëm është përfshirë një fond për të paguar tarifën e dërgimit dhe kthimit të fletëve të votimit.

LEXONI GJITHASHTU:

• “Vota e emigrantëve” Kaso: KQZ të zgjidhë problemin me postat, ne e suportojmë
• PS dhe PD bien dakord për ndryshimet në Kodin Zgjedhor: Do e bëjmë për diasporën