SPAK mbush 5 vite, zyrtari i lartë amerikan i pranishëm në Tiranë për ceremoninë

Zëvendësndihmës Sekretari Amerikan për Ballkanin Perëndimor, Alexandër Kasanof, ndodhet sot në Tiranë për të marrë pjesë në ceremoninë që shënon 5-vjetorin e krijimit të SPAK.

Kasanof, i cili mori detyrën në korrik të këtij viti si pasardhës i Gabriel Escobar, pritet të mbajë një fjalim të rëndësishëm në këtë aktivitet, duke riafirmuar mbështetjen e SHBA-së për reformën në drejtësi në Shqipëri. Shtetet e Bashkuara janë cilësuar si një ndër ideatorët dhe mbështetësit kryesorë të këtij procesi.

Në pesë vite funksionimi, SPAK ka luajtur një rol kyç në luftën kundër korrupsionit dhe krimit të organizuar. Gjatë kësaj periudhe, institucioni ka hetuar dhe çuar përpara drejtësisë një numër të konsiderueshëm zyrtarësh dhe ish-zyrtarësh të lartë, përfshirë ish-kryeministra, ministra, deputetë dhe kryetarë bashkish, duke shkaktuar reagime të forta politike.

Sipas kreut të SPAK, Altin Dumani, në këto vite janë sekuestruar dhe konfiskuar asete me vlerë mbi 150 milionë euro, ndërsa bashkëpunimi ndërkombëtar ka qenë një nga shtyllat kryesore të suksesit në luftën kundër pandëshkueshmërisë. Për përpjekjet dhe qëndrueshmërinë e tij në këtë betejë, Altin Dumani është shpallur nga SHBA si “kampion i luftës kundër korrupsionit për vitin 2024”.

Puna dhe arritjet e SPAK kanë marrë vlerësime pozitive nga partnerët ndërkombëtarë, veçanërisht nga SHBA dhe BE, të cilat e shohin këtë institucion si thelbësor për suksesin e reformës në drejtësi në Shqipëri.

LEXONI GJITHASHTU:

• Ceremonia për 5-vjetorin e SPAK, Altin Dumani: Treguam që nuk ka të paprekshëm
• Kasanof: Prokurorët e SPAK të lejohen të aplikojnë sërish pas mbarimit të mandatit