Përse Rusia mori vendimin të tërheqë ushtrinë në kufirin me Ukrainën?

Nga dita e djeshme është raportuar se Rusia ka filluar tërheqjen e trupave të saj ushtarake  nga vija e frontit në rajonin Donbass të Ukrainës.

Një veprim i tillë u bë me dije  nga ministri rus i Mbrojtjes Shoigu dhe është mirëpritur nga Presidenti i Ukrainës  Zelenskiy, i cili e ka cilësuar një ulje të tensioneve mes dy vendeve.  Sipas analistëve tërheqja e trupave erdhi  pasi administrata amerikane e Joe Biden  u shpreh e hapur për dialog për të diskutuar me Moskën mbi këtë  çështje.

“Disa mendojnë se ky veprim është një sinjal për administratën amerikane  e cila është e gatshme për dialog. E mes shumë çështjeve të tjera,  problemet me Ukrainën  mund të diskutohen në mënyrë bilaterale. Në princip më duket se ky version meriton vëmendje, pasi  sanksionet që u miratuan kohët e fundit nga administrata  Biden, në përgjithësi, janë mjaft simbolike, gjithçka mund të ishte edhe më keq. Por  vetëpërmbajtja e kësaj administrate dhe gatishmëria e saj për dialog ndoshta ndikoi gjithashtu në pozicionin e Moskës”, tha Andrey Kortunov, drejtor i Këshillit për Çështjet e Jashtme në Rusi.

Presidenti i Ukrainës Zelenskiy ka ftuar homologun rus Vladimir Putin që të bisedojnë  në territoret e diskutueshme, por presidenti rus tha se një takim i tillë duhet të mbahet në Moskë.

Sipas NATO-s dhe Shteteve të Bashkuara, grumbullimi i fundit i forcave ruse  ishte me i madhi që nga viti 2014, kur Rusia aneksoi Krimenë dhe mbështeti separatistët në lindje të Ukrainës.