Ndryshon ligji për kompensimin e pronave, afatet e reja

Qeveria ndryshon afatet për të gjithë qytetarët që përfitojnë nga ligji për kompensimin e pronave.

Me projektligjin e miratuar këtë javë, procesi i shqyrtimit të dosjeve do të zgjasë për 3 vitet në vazhdim, deri më 31 dhjetor 2027, ndërkohë që afati i mëparshëm ishte data 31 dhjetor 2024.

Po ashtu, fundi i vitit 2027 është afati i ri, ku Agjencia e Trajtimit të Pronave do të vlerësojë vetëm financiarisht të gjitha vendimet përfundimtare të pavlerësuara që kanë njohur të drejtën e kompensimit, duke e shtyrë procesin me tre vite.

Afati i ri është miratuar me argumentin se është e pamundur të respektohen afatet fillestare, pasi procesi u ngadalësua për shkak të vëllimit të madh të dosjeve dhe proceseve gjyqësore.

Ndryshimet ligjore përcaktojnë se procesi i pagesës për të gjitha vendimet përfundimtare që kanë njohur të drejtën e kompensimit do të përfundojë deri më 31 dhjetor 2028.

Me këto rishikime, tashmë pritet shqyrtimi i mbi 7 mijë dosjeve që janë ende pa vendim nga ATP dhe kompensimi i mbi 25 mijë vendimeve të arkivuara prej vitesh në institucion.

Në vlerë financiare, buxheti i shtetit do të miratojë çdo vit një fond financiar, jo më pak se 5 miliardë lekë, deri në vitin 2028.

LEXONI GJITHASHTU:

• Ulet tatimi, sa pritet të mbajë shteti gjatë shit-blerjes së një prone
• Shtyhet kompensimi i pronarëve! Afati i fundit viti 2028, ATP kërkon më shumë kohë