Bllokim rrugësh në Prrenjas për shkak të reshjeve të dendura të borës

Reshjet e dendura të dëborës kanë bllokuar prej më shumë se 3 orësh aksin rrugor nga Pogradeci deri në Prrenjas dhe më tej, duke krijuar vështirësi të mëdha për banorët dhe udhëtarët.

Banorët raportojnë mungesën e borëpastrueseve, çka ka rënduar situatën dhe ka bërë rrugën nacionale thuajse të pakalueshme.

Trashësia e dëborës ka arritur deri në 50 cm në Steblevë, ndërsa ngricat e shoqëruara me reshjet kanë përkeqësuar kushtet e qarkullimit. Në aksin Librazhd-Peshkopi, pavarësisht përpjekjeve me borëpastruese, rruga mbetet pothuajse e pakalueshme.

Gjithashtu, në disa zona raportohet mungesë energjie elektrike, duke shtuar shqetësimet për banorët e izoluar. Banorët e Prrenjasit kërkojnë ndërhyrje të menjëhershme nga autoritetet për të shmangur përkeqësimin e situatës dhe për të garantuar lëvizjen e sigurt në këto kushte të vështira atmosferike.

LEXONI GJITHASHTU:

• Reshjet spostohen në Jug, vjen i ftohti polar – Parashikimi i motit për javën
• Reshjet e dëborës në Qarkun e Korçës, dhjetëra fshatra pa energji elektrike