“Historia e një krimi lufte Reçak”, Walker promovon librin e tij në Prishtinë

“Historia e një krimi lufte Reçak”, autor i të cilës është ambasadori William Walker u  promovua në Prishtinë.

Me rastin e përvjetorit të masakrës së Reçakut, ai përmes këtij libri solli përjetimet e tij personale lidhur me masakrën që tronditi komunitetin ndërkombëtar dhe ndikoi në ndërhyrjen e NATO-s në Kosovë. Interesimi për ta pasur këtë libër ishte i madh.

“Prej dje kemi ekspozuar një promovim të mbyllur ku ka pasur personalitete të ndryshme dhe që dje ka pasur një interesim të madh për librin gjë që shihet edhe nga masa e tubuar”, tha Latif Mustafa , zyrtar për komunikimin nga libraria “Dukagjini”.

Qytetarët dhe lexuesit që morën pjesë në promovim e shohin ambasadorin Walker si profet për shqiptarët.

“Kam ardhur edhe për ta blerë librin por edhe për ta parë nga afër ish-ambasadorin William Walker, i cili ka bërë kthesë shumë të madhe në ndërgjegjësimin e opinionit ndërkombëtarë për pozitën e shqiptarëve në Jugosllavi”, tha një qytetar.

Një tjetër qytetar shprehet mirënjohës ndaj Walker për atë çfarë ka bërë për Kosovën me anë të këtij libri.

“Vij për të respektuar ish-ambasadorin William Walker, për ta takuar dhe falenderuar për të gjithë atë që ka bërë për popullin e Kosovës. Librin tani e kam blerë dhe mendoj se është i qëlluar sepse i ka të gjitha ato që duhet të ketë një libër, prandaj do ta lexojmë deri në fund”, tha ai.

Libri është një përmbledhje e kujtimeve të William Walker mbi ngjarjet në Reçak dhe krimet e kryera nga forcat kriminale serbe. Sipas Walker, libri është një dëshmi historike mbi atë që ndodhi, duke e trajtuar nga perspektiva e një diplomati që pati rol të drejtpërdrejtë në ekspozimin e kësaj masakre të tmerrshme duke e konsideruar si një moment kyç që ndryshoi të ardhmen e vendit.

LEXONI GJITHASHTU:

• “Solo” i Alfred Lelës, gazetari sjell një botim ndryshe, prezanton librin me poezi
• “Kadare, identiteti i keqkuptuar”, Ilir Yzeiri boton librin e parë për shkrimtarin