Kush do ta qeverisë Libanin? Macron vizitë në Bejrut, synimi i presidentit francez

Presidenti i Francës, Emmanuel Macron, udhëtoi këtë të premte në Liban për herë të parë që nga viti 2020, në përpjekje për të ndihmuar në përshpejtimin e formimit të një qeverie që mund të zbatojë reformat dhe të hapë mundësitë për rindërtimin e vendit.

Franca ka luajtur një rol kyç në përpjekjet për të thyer bllokimin politik të Libanit, veçanërisht pas një armëpushimi të ndërmjetësuar nga Parisi dhe Shtetet e Bashkuara në nëntor midis Izraelit dhe Hezbollahut të mbështetur nga Irani. Ky angazhim ka çuar në zgjedhjen e një presidenti të ri dhe një kryeministri për Libanin.

Libani ka pasur lidhje të forta historike me Francën si ish-protektorat francez, por marrëdhënia ka qenë e ndërlikuar gjatë viteve të fundit. Në vitin 2020, Macron kishte investuar një pjesë të madhe të kapitalit të tij politik për të bindur aktorët libanezë të mbështesin reformat politike dhe financiare pas shpërthimit tragjik të portit të Bejrutit, i cili shkaktoi vdekjen e më shumë se 200 njerëzve.

Ministri i Jashtëm francez, Jean-Noel Barrot, i cili do të udhëtojë me Macron në Liban, deklaroi se përmes mbështetjes popullore dhe një konsensusi të gjerë të brendshëm dhe ndërkombëtar, qeveria e re libaneze mund të veprojë me vendosmëri për të rivendosur sovranitetin e shtetit dhe për të nisur rindërtimin e vendit.

Një burim nga presidenca franceze ka konfirmuar se objektivi i vizitës është të nënvizohet rëndësia e sovranitetit të Libanit dhe të sigurohet mbështetje për reformat strukturore ekonomike që do të rikthenin besimin ndërkombëtar dhe do të siguronin një qeveri të bashkuar që mund të nxisë ndryshimin.

Macron gjithashtu diskutoi me Princin e Kurorës së Arabisë Saudite, Mohammed bin Salman, për angazhimin e vazhdueshëm të Riyadit në Liban, përfshirë mbështetje financiare dhe përforcimin e Forcave të Armatosura Libaneze. Ky angazhim është i rëndësishëm për stabilizimin e vendit, duke përfshirë kontrollin mbi Libanin jugor, si pjesë e një plani tërheqjeje të trupave izraelite deri në fund të janarit.

Kujtojmë se presidenti libanez Joseph Aoun emëroi Kryetarin e Gjykatës Ndërkombëtare të Drejtësisë, Nawaf Salam në postin e kryeministrit pasi shumica e ligjvënësve të hënën votuan për të, një goditje e fuqishme kundër Hezbollahut, i cili akuzoi rivalët e tij se donin ta mënjanonin grupin militant.

Përzgjedhja e zotit Salam ishte shenjë e ndryshimit të dukshëm në ekuilibrin e pushtetit të fraksioneve të ndryshme sektare të Libanit, që kur Hezbollahu pësoi goditje të rëndë gjatë luftës me Izraelin vitin e kaluar dhe me rrëzimin e aleatit të tij në Siri, Bashar al-Assad.

Presidenca tha se zoti Salam, i cili për momentin gjendet jashtë vendit dhe pritet të kthehet të martën, siguroi përkrahjen e 84 prej 128 ligjvënësve në parlament dhe se Presidenti Aoun ftoi atë të formojë qeverinë.

Zoti Salam mori përkrahjen e fraksioneve të krishtera dhe nga ligjvënës të rëndësishëm duke përfshirë disa aleatë të Hezbollahut.

Por ligjvënësit e Hezbollahut dhe aleatit të tij shiit nga Lëvizja Amal, nuk emëruan askënd për këtë pozitë, duke sinjalizuar se ata aktualisht nuk synojnë të përfshihen në qeverinë e zotit Salam.

LEXONI GJITHASHTU:

• Parlamenti i Libanit emëron president shefin e ushtrisë
• Izraeli i paralajmëron rebelët Huthi: Rrezikoni fatin e Hamasit dhe Hezbollahut