Tenderi “Skërficën”, SPAK jep pretencën: Sa vite burg kërkohet për ish-zyrtarët

Prokuroria e Posaçme shpalli pretencën për ish-drejtoreshën e Autoritetit Rrugor Shqiptar, Sonila Qato, e akuzuar për veprën penale “Shkelje e barazisë në tendera”, si dhe për ish-zyrtarët e tjerë, të cilët u morën të pandehur për tenderin me vlerë 19 milionë euro për tunelin e Skërficës, në rrugën Kardhiq-Delvinë.

Për Sonila Qaton dhe Elona Gogon, SPAK kërkoi 1 vit burg, me dënim plotësues që për 5 vite të mos ushtrojnë funksione publike. Ndërsa për Simon Prendin, organi i akuzës kërkoi 2 vite burg dhe që për 3 vite të mos ushtrojë funksione publike.

Për dy anëtarët e komisionit të vlerësimit të ofertave, Almir Hoxhaj dhe Arbër Troka, u kërkua 2 vite burg, me dënim plotësues, 3 vite heqje nga e drejta për të ushtruar funksione publike.

Prokurori Elvin Gokaj kërkoi dënimin e Ardit Salillarit me 9 muaj burg, për Admir Pahumin 1 vit burg dhe për Nikollaq Mihalin 8 muaj.

Po ashtu, organi i akuzës kërkoi që Arjana Hasani të dënohet me 2 vite burg, ndërsa Miranda Shkurti me 8 muaj.

Hetimet për Qaton dhe ish-zyrtarët e tjerë përfunduan në muajin tetor të vitit 2022.

Kallëzimi penal u bë në strukturën e Posaçme Antikorrupsion në muajin shtator të vitit 2019 nga kompania “Gjoka Konstruksion”, e cila pretendoi se ishte përjashtuar në mënyrë të drejtpërdrejtë dhe antikushtetuese nga prokurimi.

Ish-drejtoresha e ARRSH-së, Sonila Qato dhe disa ish-vartës të saj akuzohen se favorizuan një shoqëri në tenderin 19 milionë euro për tunelin e Skërficës në rrugën Kardhiq-Delvinë në vitin 2019. Qato i mohon akuzat.

Mbrojtja do të zhvillohet më 5 shkurt, në orën 14:00, ku më pas gjykata do të shpallë vendimin mbi kërkesën e Prokurorisë së Posaçme.

LEXONI GJITHASHTU:

• Hetimet për “Toyota Yaris”, Dumani paralajmëron Berishën. Çfarë thotë për Olsi Ramën
• Dumani merr kompetencat e Komisionerit Publik në KPA