Mediat ndërkombëtare jehonë ndarjes nga jeta të Kryepeshkopit Anastas Janullatos

Mediat ndërkombëtare i kanë bërë jehonë ndarjes nga jeta të Kryepeshkopit të Tiranës, Durrësit dhe gjithë Shqipërisë, Anastas Janullatos.

Agjensia e lajmeve Reuters ka vënë në pah rolin e Janullatos në ringritjen e Kishës Ortodokse Autoqefale të Shqipërisë pas rënies së regjimit komunist dhe përkushtimin e tij për dialogun ndërfetar.

“Ai u zgjodh të udhëhiqte Kishën në vitin 1992 pas rënies së regjimit komunist që kishte ndaluar fenë për dekada. Gjatë udhëheqjes së tij, ai u angazhua si mbështetës i zëshëm i dialogut ndërfetar dhe ndihmoi të varfrit dhe të dëbuarit,” shkruan Reuters.

Në raportim, agjencia ka dhënë detaje dhe nga trajtimi i tij shëndetësor, duke sqaruar se Kryepeshkopi u shtrua fillimisht në një spital në Tiranë për grip, por gjendja e tij u përkeqësua, duke çuar në transferimin e tij në Athinë me një avion ushtarak.

Janullatos ndërroi jetë këtë të shtunë nga dështimi i shumëfishtë i organeve në spitalin Evangelismos.

France 24, në artikullin e saj, ka theksuar aftësitë diplomatike dhe përpjekjet e Kryepeshkopit për të mbrojtur të drejtat e njeriut gjatë tri dekadave të shërbimit të tij në Shqipëri. Artikulli vë në dukje: “Anastasios, i lindur në Pire, ishte një figurë karizmatike dhe diplomatike, i njohur për qëndrimin e tij të butë dhe aftësinë për të ndërtuar ura mes feve të ndryshme. Ai ringjalli Kishën Ortodokse në një vend me shumicë myslimane dhe udhëhoqi me përkushtim për dekada.”

France 24 ka rikujtuar sfidat shëndetësore të Kryepeshkopit vitet e fundit, duke përfshirë trajtimet në Athinë dhe përballjen me COVID-19 në vitin 2020, kur ai qëndroi për 12 ditë në spital.

Mediat theksojnë trashëgiminë shpirtërore dhe diplomatike që Kryepeshkopi Anastas la pas, si një figurë që luajti një rol të rëndësishëm në historinë moderne të Kishës Ortodokse Shqiptare dhe në ndërtimin e bashkëjetesës paqësore mes feve në rajon.

LEXONI GJITHASHTU:

• Ndahet nga jeta Kryepeshkopi i Shqipërisë Anastas Janullatos
• Vdekja e Kryepeshkopit Anastas, reagon Begaj: Humbje e madhe për Kishën e Shqipërinë