Flamurtarin e “bezdis” terreni, vlonjatët kanë pretendime për fushën e Lushnjës

Gara në Kategorinë e Parë të futbollit vijon të jetë e fortë, sidomos për kreun, ku Vora, Flamurtari dhe Besa synojnë ngjitjen e menjëhershme në elitë.

Secila prej tyre pret ndalesën e kundërshtarit, ndërsa kjo javë rezervon përballjet Besa-Kukësi të shtunën dhe Burreli-Vora, si dhe Lushnja-Flamurtari të dielën.

Vlonjatët kanë pretendime për fushën ku do të luhet ndeshja, dhe burime për Euronews Albania bëjnë me dije se ata kanë kërkuar që të zhvillohet në një terren tjetër.

Reshjet e shiut në stadiumin “Roza Haxhiu” kanë bërë që terreni të jetë i rënduar dhe me baltë, dhe për këtë arsye, Flamurtari beson se është në disfavor.

Për këtë arsye, vlonjatët kërkojnë që dueli i së dielës të luhet në një terren tjetër, me fushë sintetike, dhe Lushnja e mundëson këtë si qytet.

Aktualisht, nuk ka asnjë ndryshim të vendimit, dhe përballja Lushnja-Flamurtari do të luhet në “Roza Haxhiu” të dielën.

FSHF pritet të vlerësojë gjendjen e fushës nga afër, dhe nëse pretendimet e vlonjatëve konfirmohen, mund të ketë ndryshim të stadiumit. Kjo ka ndodhur edhe në ndeshje të tjera të mëparshme, ku stadiumet nuk kanë qenë në kushte të duhura për të luajtur.

LEXONI GJITHASHTU:

• Flamurtari vendos rekord, rezultati më i thellë në futbollin shqiptar
• Flamurtari fitore me zemër në dorë, kuqezinjtë ia dalin me golin e Atandës në limite