Në Vlorë po ëndërrojnë rikthimin në Superligë, e janë rezultatet e Flamurtarit ato të cilat kanë kthyer besimin tek lojtarët, drejtuesit, por edhe tifozët. Kuqezinjtë morën fitoren e 9-të radhazi në Kategorinë e Parë, pasi mposhtën Lushnjës në shifrat 2-1. Një përballje tejet e luftuar që u vulos në limitet e kohës shtesë.

Trashi kaloi vendësit në avantazh, por lushnjarët rikthyen balancat me Kaçanollin 10 minuta nga fundi. Kur u duk se gjithçka do të mbyllej në barazim, e vlonjatët do të hidhnin një hap fals, u shfaq Atanda që realizoi në fund, për t’i dhënë 3 pikët e radhës skuadrës.

Pas ndeshjes, trajneri Agostinelli vlerësoi kundërshtarin për paraqitjen e bërë.

“Është një fitore siç ndodh shpesh në futboll, në minutën e fundit; ndonjëherë të vjen në favor, ndonjëherë në disfavor. Që barazimi ishte rezultati më i drejtë është e para që gjejmë një ekip që na vë kaq në vështirësi; për herë të parë mund të themi se nuk e dominuam ndeshjen dhe vuajtëm. Po, është e drejtë që e rëndësishme janë 3 pikët; me eksperiencën që kam, e kuptova që ishte një ditë jo e mirë sot”, tha Andrea Agostinelli, trajner i Flamurtarit.

Në kampin lagunar ka keqardhje për disfatën.

“Sigurisht që më vjen keq për mënyrën si erdhi ndeshja, sepse kemi bërë një ndeshje fantastike; djemtë duhen përgëzuar, kanë udhëhequr ndeshjen nga fillimi deri në fund”, u shpreh Erion Xhafa, trajner i Lushnjës.

Flamurtari renditet në vendin e parë në klasifikim në Kategorinë e Parë me 27 pikë, 2 më tepër se Vora që është ndjekësja më e afërt.

LEXONI GJITHASHTU:

• Flamurtari e Barcelona rikthehen sërish në fushë pas 38 vitesh, flasin protagonistë
• Eliminoi Apoloninë, Flamurtari bën kërkesë për shtyrjen e ndeshjes me Laçin