Përmbytjet në Durrës, nis verifikimi i dëmeve, mbi 400 banesa nën ujë

Reshjet e dendura të ditëve të fundit kanë vënë në alarm qytetin e Durrësit, duke shkaktuar përmbytje masive në disa lagje dhe dëme të konsiderueshme për qindra familje. Më shumë se 400 banesa janë mbuluar nga uji.

Situata e krijuar ka nxjerrë sërish në pah një problem të vjetër dhe të përsëritur, kanalizime të bllokuara nga mbeturinat, të cilat nuk pastrohen në kohë, duke mos përballuar rrjedhën e ujërave.

Banorët thonë se për këtë situatë nuk mund të fajësohen vetëm reshjet, por edhe neglizhenca e institucioneve që, sipas tyre, kujtohen të ndërhyjnë vetëm kur dëmet janë bërë të pashmangshme.

“Gjithmonë kur ka shira, kalon. Mos pastrimi i kanalit është ajo patjetër. Në Plepa është bllokuar komplet. Janë ankuar te lagjja, po do e pastrojmë, do e pastrojmë varet si mbas interesit të atyre”, thotë një qytetar.

“Ky pastrohet kur përmbytet, në bashki ne ankohemi gjithmonë, po s’e vë njeri ujin në zjarr”, shprehet një tjetër.

Përpos ankesave të qytetarëve, institucionet në Durrës nuk kanë dhënë ende një përgjigje për masat konkrete që do të mund të ndërmerren për shmangien e përmbytjeve të tjera. Ndërkohë këtë të hënë ka nisur verifikimi i dëmeve, ku në terren janë angazhuar 13 grupe pune, për të nxjerrë në pah edhe bilancin e përmbytjeve në Durrës.

LEXONI GJITHASHTU:

• Përmbytjet në Durrës/ Gruaja kërkon ndihmë: Të na hiqet uji, kalova natën në tarracë
• Durrës| Urbani i zë poshtë dorën pasagjerit, shoqërohet në polici shoferi