Nga Uganda në Shqipëri, historia e punëtoreve të huaja që po mbushin tregun e punës

Bizneset shqiptare po rekrutojnë punëtorë të huaj në sektorë të ndryshëm për t’u përgatitur për sezonin veror, ndërsa shumë shqiptarë kërkojnë mundësi punësimi jashtë vendit.

Xhoi është 26 vjeç nga Uganda. Në vendin e tij punonte si elektriçist, por të ardhurat nuk mjaftonin për të mbuluar kushtet bazë të jetesës. Zgjidhjen e gjeti në Shqipëri.

“Jam e lumtur me punën këtu. Po kërkoja mundësi të reja dhe vendosa të lë vendin tim. Në Ugandë nuk paguhesha mirë. Këtu ndihem më mirë dhe kam në plan të qëndroj për 2-3 vite të tjera”, thotë Joyce Dorenab.

Punonjësit e huaj kërkohen me kualifikime të ndryshme, sipas nevojave të bizneseve.

Një nga sektorët me më shumë kërkesë është ai i terapistëve në SPA, ku në pesë vitet e fundit shumica e punonjësve janë vajza emigrante.

“Jam nga Bali, Indonezia. Pas pandemisë, çdo gjë në vendin tim ishte e mbyllur. Në Shqipëri kishte nevojë për terapiste dhe aplikova. Punoj këtu që prej vitit 2022. Tani po përfundoj kontratën dhe mendoj të kthehem në vendin tim, por ende nuk e di çfarë do të bëj më pas”, thotë Eka Suciantari.

Ekspertët: Kompanitë shqiptare duhet të ndryshojnë praktikat e punës

Sipas ekspertëve, bizneset duhet të përmirësojnë kushtet e punës për të mbajtur punonjësit shqiptarë, përndryshe ky fenomen do të bëhet gjithnjë e më i zakonshëm.

“Fenomeni i shkëmbimit të punonjësve do të vijë duke u rritur. Vende si Gjermania dhe Spanja ofrojnë paga më të larta dhe Shqipëria është e pambrojtur përballë kësaj konkurrencë”, thotë eksperti i punësimit Erion Muça.

Në vitin 2024, mbi 13 mijë të huaj u regjistruan për të punuar në Shqipëri, një shifër që po rritet çdo vit.

LEXONI GJITHASHTU:

• Shqipëria me nivelin më të lartë të papunësisë, të huajt zënë vendet e punës
• 20% e pushuesve të huaj që vijnë në Shqipëri flenë në hotele