NATO vazhdon patrullimin në Detin Baltik pas këputjes së kabllove

Marina e Estonisë ka ndryshuar misionin e saj, duke kaluar nga mbrojtja e kufijve dhe kërkimi i minave në mbrojtjen e infrastrukturës detare, pas dëmtimit të një numri të madh kabllosh nënujore.

Që nga fillimi i vitit 2025, luftanijet estoneze, si anija mina-kërkuese “Sarkala”, kanë marrë pjesë në operacione të NATO-s për mbrojtjen e Detit Baltik, duke patrulluar zona të shtrira nga Talini deri në Gjirin e Finlandës.

Një nga ngjarjet që ka shkaktuar këtë ndryshim është dëmtimi i kabllit energjetik Estlink-2, që lidh Estoninë me Finlandën në dhjetor 2024. Ekipazhi estonez tani është angazhuar për të mbrojtur kabllin e dytë në këtë rajon.

Ndërkohë, mbi 10 kabllo të tjera janë dëmtuar në detin Baltik, dhe hetimet për mundësinë e sabotimit janë në zhvillim. Zyrtarët ushtarakë estonezë po shqyrtojnë mundësinë që dëmtimi i kabllove të ketë ndodhur për shkak të spirancave të lëshuara aksidentalisht nga anijet tregtare.

Marina estoneze, në bashkëpunim me marinën finlandeze, ka realizuar stërvitje ushtarake për të forcuar gatishmërinë dhe për të mbrojtur këto tubacione jetike për lidhjen e vendeve nordike dhe baltike.

LEXONI GJITHASHTU:

• Shtetet e Baltikut shkëputen nga rrjeti energjetik rus
• Tarifat ndaj Kinës, kompania Apple do të investojë 500 miliardë dollarë në SHBA