Partia Demokratike Shkodër: Mbështesim kryetarin Lulzim Basha në misionin e tij

Dega e Partisë Demokratike në Shkodër përmes një deklarate ka shprehur gatishmërinë e saj për të vijuar më tej misionin e PD-së, së bashku Lulzim Bashën si kryetar, duke theksuar se e mbështet kreun aktual të PD-së në misionin e tij.

“Të dashur Shkodran, misioni i Partisë Demokratike dhe i kryetarit te saj Lulzim Basha nuk ndalet këtu, por ai vijon  deri ne çrrënjosjen e sistemit te instaluar dhe rikthimin e shpresës për Shqipërinë dhe shqiptareve”, deklaroi PD në Shkodër.

Partia Demokratike në Shkodër tha për PD-në se është fituesja reale e këtyre zgjedhjeve, me pretendimin se ka pasur mashtrim elektoral nga ana e Partisë Socialiste.

“Numri i lartë i votave të pavlefshme si në qarkun tonë ashtu edhe në të gjithë Shqipërinë tregon që mashtrimi elektoral ka vazhduar nga ana e PS dhe aleatëve të saj në krim, deri në tavolinat e numërimit, ku numëruesit e tyre janë parë me zë dhe figurë duke plotësuar në shkelje flagrante të ligjit fletët e votimit”, u shpreh PD në Shkodër.