Turqia: Sulmi në Gaza shënon fazë të re në “politikën e gjenocidit” të Netanjahut

Ministria e Jashtme turke ka dënuar ashpër valën e fundit të sulmeve vdekjeprurëse të Izraelit në territor, duke deklaruar se vrasja masive e palestinezëve shënon një fazë të re në atë që ajo e përshkroi si “politikën e gjenocidit” të qeverisë Netanyahu.

“Izraeli sfidon njerëzimin përmes shkeljeve të ligjit ndërkombëtar dhe vlerave universale në mënyrën më të rëndë”, tha Ministria e Jashtme turke në një deklaratë zyrtare.

Deklarata më tej paralajmëroi se veprimet agresive të Izraelit kërcënojnë stabilitetin rajonal në një kohë kur përpjekjet ndërkombëtare për paqen janë duke u intensifikuar.

“Agresioni i shfaqur nga qeveria izraelite kërcënon të ardhmen e rajonit. Është e papranueshme që Izraeli po shkakton një spirale të re dhune,” vuri në dukje ministria.

Ankaraja i bëri thirrje komunitetit ndërkombëtar të marrë një qëndrim të vendosur kundër Izraelit, duke kërkuar veprim të menjëhershëm për një armëpushim të qëndrueshëm dhe dërgimin e ndihmave humanitare në Gaza.

Duke riafirmuar qëndrimin e Ankarasë, ministria theksoi gjithashtu mbështetjen e palëkundur të Turqisë për kauzën palestineze dhe angazhimin ndaj nismave rajonale të paqes.

LEXONI GJITHASHTU:

• Sulmi me qindra viktima në Gaza, Netanjahu: Shënjestruam objektivat terroriste
• “Herët a vonë do të paguajë çmimin për këtë gjenocid”, Erdogan kërcënon Izraelin