Përfundon aksioni policor në 21 lokacione në Mitrovicë, arrestohen 16 persona

Ka përfunduar aksioni policor në 21 lokacione në Mitrovicë, ku janë arrestuar 16 persona. Lajmin e ka konfirmuar zëdhënësi i Prokurorisë Themelore të Mitrovicës, Valon Preteni, i cili shtoi se me vendim të prokurorit, 13 nga të arrestuarit janë dërguar në mbajtje.

Policia e Kosovës realizoi aksionin në jug dhe veri të Mitrovicës, që kishte për qëllim luftimin e veprimtarive kriminale, përfshirë kontrabandimin me armë dhe municion.

Zëdhënësi i Policisë së Kosovës, Baki Kelani, tha se operacioni policor nisi në orët e hershme të mëngjesit, dhe përfshiu dy rajone të Kosovës.

Njoftimi i plotë nga Policia e Kosovës dhe Prokuroria e Mitrovicës:

“Prishtinë, më 19 mars 2025

Policia e Kosovës, respektivisht Drejtoria për Hetimin e Krimit të Organizuar dhe Krimeve të Rënda, në koordinim me Prokurorinë Themelore në Mitrovicë, të mbështetura nga njësi relevante policore dhe Inspektorati Policor i Kosovës, me datën 19.03.2025, pas hetimeve disa mujore, ka bërë realizimin e urdhëresës së Gjykatës Themelore në Mitrovicë, ku janë kontrolluar gjithsej 21 lokacione në Mitrovicë Jugu, Mitrovicë Veri, Vushtrri, Skenderaj dhe Leposaviq.

Nga ky operacion policor janë shoqëruar në Polici gjithsej 16 persona lidhur me dyshimin e kryerjes së veprave penale ‘detyrim’ si dhe ‘importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse’.

Si dëshmi materiale gjatë kontrollit janë sekuestruar 9 armë zjarri, 200 fishekë, municione të ndryshme, 15 telefona mobilë, 2 palë pranga, thikë, tyta të armës, fatrolla për armë dhe 1 DVR.

Pas intervistimit lidhur me rastin, me vendim të prokurorit, 13 persona shkojnë në ndalim prej 48 orësh.

LEXONI GJITHASHTU:

• Berisha shpalos programin e PD: Do t’u presim dorën atyre që prekin paratë publike
• Tragjedi në ujërat italiane, përmbyset varka metalike me 45 emigrantë